Бірінші орында қоршаған ортаға көп мөлшерде зиянды шығарындылар тастайтын өнеркәсіптік өндіріс тұрады. Қандай да бір өнеркәсіптік материалды алу үшін адам табиғаттан кен, мұнай, көмір сияқты басқа да заттарды алады. Ал пайдаланып болған соң олар химиялық өзгерген күйінде қалдықтар түрінде табиғатқа қайтарылады. Өсімдіктер де, жануарлар да бұл қалдықтарды тірі ағзаларға зиянды емес заттарға айналдыра алмайды.

Пайдалы қазбаларды қазып алу және тасымалдау қоршаған ортаға зиянды әсер етеді. Ашық әдіспен алу (өндіру) кезінде үлкен аумақта құнарлы топырақ қабаты толығымен жойылады .
Шахталық әдіспен өндіру кезінде жерде алып бос жерлер түзіледі де, кейін олар жер қыртысының бұзылуына әкеліп соғады. Мұнайды су арқылы тасымалдау кезінде болған апат салдарынан су жануарларына қауіп төнеді.

Ауыл шаруашылығы да өндіріс сияқты экожүйеге және жал пы қоршаған ортаға кері әсер етеді. Бірақ ауыл шаруашылығынсыз адамзат санының көбейе алмайтынын ұмытпаған жөн.
Ауыл шаруашылығында табиғи ресурстарды тиімсіз пайдалану қайтымсыз салдарға апарып соқты. Арал трагедиясы тәуелсіз Қазақстан үшін нағыз экологиялық апат болып табылады.

Қару-жарақтың жаңа түрлерін сынау адамзаттың қауіпті іс-әрекеттерінің бірі, соның салдарынан табиғи экожүйелер жойылады. Сонымен қатар ядролық қару-жарақты сынау барысында қоршаған ортаға радиоактивті заттар шығарылады. Қару-жарақтың жаңа түрін сынауды тоқтату шешімін таппай жатқан мәселелердің бірі.